गरिए असम्भव के छैन र विदेशबाट फर्किएका युवा व्यावसायिक बाख्रा पालनमा

म्याग्दीको अर्मनमा विदेशबाट फर्किएका एक जना युवाले बाह्र लाख रुपैयाँ लगानी गरेर व्यावसायिक बाख्रा फार्म स्थापना गरेका छन् ।  अर्मन–५ पाँखुका ४० वर्षीय वीरबहादुर खड्काले सोही गाविस– ४ धारा गाउँमा धौलागिरि फार्म स्थापना गरी बाख्रापालन सुरु गरेका हुन्। चार वर्षसम्म दक्षिण कोरियामा काम गरेर घर फर्किएका खड्काले बाख्रापालन सुरु गर्नका लागि आठ लाखमा खोर निर्माण तथा चार लाखमा बाख्रा खरिद गरेर थालनी गरे।

 खड्काले एक वर्षअघि २६ वटा खरी र जमुनापारी जातका बाख्राबाट फार्म सुरु गरेका थिए। उक्त फार्ममा बाख्रा बढेर हाल ५० वटाभन्दा बढी भएका छन् । अब मासुका लागि खसी र नश्ल सुधारका लागि प्रजननयोग्य बोका बिक्री गर्ने उनले बताए । दक्षिण कोरियामा कृषि फार्ममा काम गरेका खड्काले सो सम्बन्धी व्यावसायिक ज्ञान र अनुभव हासिल गर्नुभएको छ । बाख्रा फार्ममा घरपरिवारका तीन जना सदस्यले पूर्ण रोजगारी पाएका छन् ।
 बाख्रालाई घाँस आपूर्ति गराउन खाली पाखोमा बहुबर्खे, डाले र भुइँ घाँसखेती गर्ने खड्काको योजना छ । रासस