चीनमा भेटियो चरा जस्तै पखेटा भएको डाईनोस्वोर

 चीनमा भेटियो चरा जस्तै पखेटा भएको डाईनोस्वोर 

 

भाडाका आमाबाट सन्तान जन्माउने पद्धति लाई बैधानिकता

भाडाका आमाबाट सन्तान जन्माउने पद्धति (सेरोगेसी मदर)लाई वैधता दिन सरकारले तयारी गरेको छ । सेरोगेसी मदर कार्यक्रमलाई स्वीकृति दिँदा दुरुपयोग बढ्ने भन्दै सरोकारवालाहरूले विरोध जनाउँदै आएका छन्।
काठमाडौंका केही निजी अस्पतालले अवैध रूपमा सेरोगेसी सेवा दिइरहेको समाचार सार्वजनिक भएपछि मन्त्रिपरिषद्को २ असोजको बैठकले कार्यविधि बनाएर त्यसलाई व्यवस्थित गर्न स्वास्थ्य तथा जनसंख्या मन्त्रालयलाई निर्देशन दिएको थियो । तर, मन्त्रालयले कार्यविधि बनाउनुको सट्टा केही दिनअघि मात्रै सेवा दिने अस्पतालहरूका लागि मापदण्ड तयार गरेको छ ।
स्वास्थ्य मन्त्रालयले बनाएको मापदण्डअनुसार सेरोगेसी सेवा लिने आमाबाबु र कोख भाडामा दिने महिला (सेरोगेसी मदर)समेत विदेशी हुनुपर्ने र उनीहरूले सम्बन्धित संस्थाको मापदण्डअनुसार दस्तुर तिरेपछि सेवा लिन पाउनेछन् । स्वास्थ्य संस्थामा हेपा फिल्टर जडित क्यासरियन सेक्सनबाट बच्चा जन्माउने मोडुलर ओटी, आमाका लागि आइसियू, आइभिएफ ओटी तथा ल्याब, बच्चाका लागि कम्तीमा चार शय्याको एनआइसियू सेवालगायतका पूर्वाधार हुनुपर्ने मापदण्ड बनाइएको छ ।
‘मन्त्रिपरिषद्ले त कार्यविधि बनाउन भनेको थियो । तर, कार्यविधि नभएर मापदण्ड बनाइएको छ । सामान ल्याऊ, पैसा तोक र चलाऊ भनेजस्तै भएको छ,’ स्वास्थ्य मन्त्रालयका एक अधिकारीले भने, ‘यसले पहिलेदेखि अवैध रूपमा काम गरेका अस्पतालहरूलाई वैध रूपमा गर्ने बाटो खोलिदिएको छ ।’नयाँ पत्रिका दैनिकमा समाचार छ ।

बौद्ध धर्मको पवित्र ग्रन्थ 'दोमाङ' नेपाली भाषामा अनुवाद हुदैं

बौद्ध धर्मको पवित्र ग्रन्थ 'दोमाङ' अब नेपालीमा पढ्न पाइने भएको छ । यसअघि सम्बोटा लिपिमा उपलब्ध हुदैं आएको दोमाङ त्रियान धर्म संघले नेपाली भाषामा ल्याउन लागेको हो ।

झन्डै १२ सय पृष्ठको दोमाङ अनुवादको कार्य सुरु भइसकेको त्रियानका प्रमुख तथा अनुवादक खेन्पो वागिन्द्रशीलले बताए । उनका अनुसार एक वर्षअघिबाट अनुवाद कार्य थालिएको हो । 'हामीले दोमाङ अनुवाद गर्न एउटा टिम नै बनाएका छौं, झन्डै एकवर्ष भइसक्यो अनुवाद थालेको,' खेन्पो वागिन्द्रशीलले भने, 'तीन खण्ड रहेको किताबको दुई खण्ड अनुवाद सकिसकेको छ ।'

अब आउने दोमाङमा सम्बोटा, फोनाटिक(तिब्बती उच्चरण तर नेपाली अक्षर) र नेपाली भाषासहितको आउने खेन्पोले सुनाए । दोमाङ भगवान बुद्धले रचना गरेको त्रिपिटकको सारंश भएको र हरेक बौद्धमार्गी नेपालीका लागि उपयोगी हुने भएकोले नेपाली भाषामा अनुवाद गर्नु अति आवश्यक देखिएकोले यो कार्ययोजना अघि बढाएको खेन्पोले बताए ।

दोमाङ पाठ गर्दा सम्पूर्ण बुद्धवचन पाठ गरे सरह हुने भएकोले पनि यो सम्पूर्ण बौद्धमार्गीले जान्नुपर्ने उनको धारणा छ । अहिलेसम्म तिब्बतीयन भाषामा रहेको र दोमाङ कमैले मात्र बुझ्ने भएकोले यसको सार जान्न नेपाली भाषामा हुनु अति आवश्यक रहेको खेन्पोको भनाई छ ।

केही बौद्ध ग्रन्थसमेत नेपालीमा अनुवाद गरिसकेका छन् खेन्पोले । त्यसैगरी देशविदेशमा बुद्ध वचन र दर्शनलाई सरल नेपाली भाषामा प्रवचन दिदैं आएका उनी हिन्दु परिवारबाट बौद्धमार्गी बनेका खेन्पो हुन् । उनको वास्तविक नाम नन्दप्रसाद तिमाल्सिना हो । ११ वर्षदेखि बौद्ध धर्मप्रति झुकाव राख्न सुरु गरेका उनी नेपालमा सर्वसाधारण बौद्धमार्गीका लागि बौद्धधर्मसम्बन्धी अध्ययन सामग्रीको अभाव भएको बताउँछन् ।

त्यसैले उनको अध्यक्षतामा एक वर्षअघि देखि नै दोमाङको अनुवाद थालिएको हो । दोमाङ अनुवादका निर्देशक आचार्य झाम्पा लोसाल हुन् भने सहायक निर्देशक गुहेश्वरीराज मानन्धर । तीनजनाले अनुवादको जिम्मा लिएका छन् भने समितिको संयोजकमा ध्रुबबहादुर गुरुङ, सचिव भोजराज लामिछाने र कोषाध्यक्षमा विष्णु थकाली छन् । समितिका संरक्षक शरण नायक श्री शाक्या ट्रिजिन रिन्पोछे हुन् । त्यसैगरी अनुवादक समितिमा लामा कमल भण्डारी, पुष्पमुनि बज्राचार्य पनि छन् । विदेशमा रहेका नेपालीले पनि अनुवादका लागि सहयोग गरिरहेका छन् । त्यसरी सघाउनेमा अमेरिकाबाट बुद्ध मानन्धर, डा अनिता मानन्धर, डा किशोर शेरचन, आङछिरिङ शेर्पा, बेलायतबाट अन्तिम गुरुङ, नरेश गुरुङ, अस्ट्रेलियाबाट निमा ग्याल्चेन शेर्पा छन् । त्यसैगरी तेजप्रसाद गौचन, कान्ति लामा, तुलसिंह गूरुङ पनि यस समितिमा छन् ।

दोमाङ अनुवादमा लागिपरेका छन् गुहेश्वरीराज मानन्धर पनि । पेसाले सिभिल इन्जिनियर मानन्धर ८२ वर्ष पुगे । उनी अनुवादमा पूरा समय दिएर लागेका छन् । भन्छन्, 'म रिटाएर मान्छे, पूरा समय यही अनुवादमा लागेको छु ।' तिब्बतियन भाषामा अरु ग्रन्थहरु पनि अनुवाद गरिसकेका उनी २०४० बाट नै अनुवादा कार्यमा लागेका थिए ।

आफुहरु स्वयंसेवी रुपमा लागिपरेको बताउँदै मानन्धरले दोमाङ नेपाली भाषामा ल्याउन टोलीले अथक प्रयास गरिरहेको बताए । उनले भने, 'प्रायः धेरैजसो हिमाली बुद्धिस्टले बुद्धले भनेको कोर कुरा बुझेकै छैनन्, यसका लागि दोमाङ नेपालीमा आउन जरुरी देखेर हामी लागेका हौं, यसमा हाम्रो समुह भोलन्टियरली लागेको छ ।'

अब एक वर्षभित्रै अनुवाद गरिएको दोमाङ सार्वजनिक गर्ने तयारीमा लागेको छ त्रियान । यसका लागि आउँदो वैशाख पूर्णिमा उपयुक्त हुने खेन्पो वागिन्द्रशीलले बताए । उनले भने, 'हामीले अनुवादित दोमाङ साकादावा पूर्णिमाका दिन टुँडिखेलमा भव्य समारोहबीच सार्वजनिक गरिने योजना गरेका छौं ।'

के छ त दोमाङभित्र ?

खेन्पो वागिन्द्रशील भन्छन्, 'हरेक बौद्धमार्गीले आफ्नो र जगतको भलो होस भनेर हरेक वर्ष दोमाङ पाठ गर्दछन् । यसले लाभ पनि मिल्दछ । चन्द्रपत्रोअनुसार लोसार मनाउनेहरुका लागि यो अति उपयोगी पुस्तक पनि हो । भविष्यमा आउने नराम्रा घटनाबाट बचाउने सुत्रहरु यसभित्र छन् ।' यो भित्र तीन खण्ड छन्, सुत्र, तन्त्र र विविधा छन् । यसको सुरुमै मञ्जुश्रीनामा छ । यसमा आयु कसरी लम्ब्याउने, ब्ल्याक म्याजिकलाई कसरी रोक्ने भन्ने विषय पनि छ । यो सबै विषयलाई ऐतिहासिक व्यक्ति लामा तारानाथले संकलन गरेका हुन् ।

हिमाली बौद्धमार्गीका लागि यो उपयोगी हुने उनको भनाई छ । उनका अनुसार दोमाङ बुद्धवचनको सारंश हो । दोमाङभित्र कसरी जीवनयापन गर्ने भन्ने तरिकाहरु सिकाइएको छ । त्यसैगरी मन्त्रहरु पनि भएको उनले बताए । ती मन्त्रहरु पढ्नका लागि भने विशेष अभिषेक प्राप्तले पढेमात्र फल प्राप्त हुने बताइन्छ । हिमाली बौद्धमार्गीको घरमा दोमाङ राखेको पाइन्छ । यो सबैले राखेको पाइएपनि यसभित्र के छन् भनेर धेरैले थाहा नपाएको कारण यसलाई अनुवाद गर्न लागिएको त्रियानले जनाएको छ ।

सहयोगको खाँचो

प्रसिद्ध र पवित्र ग्रन्थ नेपालीमा अनुवाद गर्नका लागि खर्चको कमी भएको उनले सुनाए । यस अनुवाद अभियानमा अनुवादकहरुले स्वयंसेवी रुपमा अनुवाद गर्दा एकहजार प्रतिका लागिसमेत ५० लाख रुपैयाँ खर्च लाग्ने उनको अनुमान गरिएको छ । 'अहिले हामीले झन्डै ७० प्रतिशत अनुवाद सकाइसकेका छौ, सबैभन्दा धेरै खर्च कागजमा लाग्ने देखियो, ५० लाख नभइ यो काम सकिन्छ जस्तो लागेन,' खेन्पो वागिन्द्रशीलले भने । यसैले यो अभियानको लागि सहयोगको खाँचो रहेको उनले बताए ।

समितिको कोषमा अहिले ९ लाख जम्मा भइसकेको कोषाध्यक्ष विष्णु थकालीले बताइन् । व्यक्तिगत सहयोग आउने क्रम जारी रहेको उनले सुनाइन् । कोषाध्यक्ष थकालीले भनिन्, 'अहिले हामीलाई व्यक्तिगत सहयोग मात्र आएको छ, स्वदेशविदेशका बौद्धमार्गी महानुभावले सहयोग गर्ने क्रम जारी छ ।'

आफुहरुले काम थालेपछि मात्र सहयोग अभियान थाल्ने नीति लिएका कारण अब सबैसामु सहयोगका लागि अनुरोध गर्ने उनले सुनाइन् । १० हजार रुपैयाँ सहयोग गर्ने सहयोगीलाई एक सेट दोमाङ उपलब्ध गराइने र सहयोगीको नाम पुस्तकमा प्रकाशन गर्ने समितिले जनाएको छ । त्यसैगरी ५० हजार सहयोग गर्नेलाई पुस्तक लोकार्पणका दिन रिन्पोछेबाट विशेष अभिषेक तथा सम्मान गरिने समितिले जनाएको छ ।

सुनको मुल्य ३ दिन भित्र १,५००ले सस्तियो

काठमाडौं, श्रावण ६ - नेपाल सुनचाँदी व्यवसायी महासंघका अनुसार बुधबार छापावाल सुनको मूल्य प्रतितोला ४८ हजार रुपैयाँ कायम भएको छ । ३ दिन अघिभन्दा छापावाल सुनको मूल्य प्रतितोला  १५ सय रुपैयाँले घटेको छ। तेजाबी सुनको मूल्य ३ दिन अगाडी आइतबार भन्दा २,००० रुपैयाँ सस्तियर प्रतितोला ४७ हजार सात सय ५० मा रुपैयाँ कायम भएको छ । त्येस्तै चाँदीको मूल्यमा प्रतितोला पाँच रुपैयाँले कमी भै ६६५ मा चाँदीको कारोबार भइरहेको महासंघले जनाएको छ । अन्तर्राष्ट्रिय बजारभाउ र सरकारले सुनमा भन्सार दर घटाएपछि साउन महिनामा सुनको मूल्यमा कमि आएको छ।

'चिन्नेलाई श्रीखण्ड नचिन्नेलाई खुर्पाको बींड’ भने झैं एउटै रुखबाट करौडौंको कमाई

एउटै रुखबाट करौडौं कमाउने भन्ने चाल पाएपछि यतिबेला काभ्रेका किसानलाई चिन्नेलाई श्रीखण्ड नचिन्नेलाई खुर्पाको बींड’ भने झैं भएको छ बुद्धचित्त । काभ्रे तिमाल बासीको दरिलो आम्दानीको स्रोत बनेको छ। स्थानीयले अहिले यसको व्यावसायिक खेतीनै सुरु गरेका छन् । बिना लगानी एउटै बोटबाट लाखौं कमाइ हुने भएपछि तिमालबासी यसको व्यवसायिक खेतीमा लागेका हुन् ।

स्थानीय तिमाल बासीका अनुसार चार वर्ष अगाडिसम्म यसको महत्व हुँदैनथ्यो अहिले यसको महत्व बढेकाले विदेशी तथा स्वदेशी व्यापारी घरमै आएर बैना दिन थालेका छन् । बुद्धचित्तको माला र बिरूवा बेचेर एकै वर्ष तिमाल बासीले वार्षिक कम्तीमा पाँच लाख आम्दानी गर्नेगरेको स्थानीय बताउछन् ।राम्रो आम्दानी हुन थालेपछि स्थानीयले थप जमिनमा विरुवा लगाउन थालेका छन् ।

तिमालमा अधिकांश बासिन्दाको आर्थिक उन्नतिको प्रमुख स्रोत नै बुद्धचित्त माला बनेको छ। प्रत्येक घरमा बुद्धचित्तकाका बिरुवा लगाइएको छ। मालाबाट राम्रो आम्दानी हुन थालेपछि बाँझो भिरपाखामासमेत बिरुवा लगाउन थालेका छन्। दोस्रो बुद्ध मानिने गुरु पद्मसम्भवले आठौं शताब्दीमा आशीर्वादस्वरूप काभ्रेको तिमाल क्षेत्रका बासिन्दालाई दिएको मानिने यो वनस्पतिले अहिले ठूलो अन्तर्रा्ष्ट्रिय बजारमा आफ्नो पहिचान बनाउदै छ । वन मन्त्रालयले काभ्रेको तिमाल क्षेत्रमा मात्रै पाइने भनेर पहिचान गरिसकेको छ ।

मालाको राम्रो मूल्य पाइन थालेपछि गाउँ छोडेर बाहिरिएका युवा फर्कन थालेका छन् गाउँमै राम्रो आम्दानी हुन थालेपछि रोजगारीका लागि विदेश गएका युवागाउँ फर्कन थालेका छन्। बुद्धचित्तको व्यावसायिक खेतीमा लागेका छन् ।

बुद्धचित्त फल्ने समयमा चोरीको भने अत्यधिक समस्या हुने गरेको छ भने विशेष गरेर चिनिया व्यापारीहरु बुद्धचित्त किन्न गाउमै पुग्ने गरेको र फल हेरि एउटा मालाको २ लाखसम्म तिर्न तयार हुनेगरेका छन् । सोचे भन्दा बडि मुल्य आउन थाले पछि तिमाल बासी अहिले असारदेखि असोज सम्म बोटको वरपर तारबार लगाएर रातभर सुरक्षामा खटिने गरेका छन् ।

व्यापारीले यसको दाना र माला चीनको तिब्बत र भारत बोधगयामा लगेर बेच्ने गरेका बताउछन्। एउटा मालामा एक सय आठ वटा दाना उनेपछि पाँच हजारदेखि एक लाख सम्म मूल्यमा बेचिने व्यवसायी बताउँछन्। बुद्धचित्तबाट राम्रो आम्दानी हुन थालेपछि तिमालबासीको आर्थिक हैसीयत नै फेरिएको छ। बुद्धिचित्तको माला किन्न आएका व्यापारिहरुका अनुसार नेपाल सरकारले विना इजाज गैरकानुनी रुपमा बुद्धिचित्त ठूलो परिणाममा विदेश निकासीहुदा समेत ध्यान नदिदा राम्रै राजश्व गुमेको र आफुहरुलाइ व्यापार गर्ने पनि अफ्टेरो र अशुरक्षीत हुदै गैरहेको गुनासो गर्न थालेका छन् ।

बुद्धचित्तको मालाबाट वार्षिक २० करोड रुपैयाँभन्दा बढी तिमालमा भित्रने गरेको स्थानीयले दावी गरेकाछन् । दुई वर्ष अघिदेखि कारोबारमा वृद्धि भएपछि बुद्धचित्त मालालाई गाउँदेखि गन्तब्य सम्म लैजान व्यापारीलाई सुरक्षा आपश्यक पर्ने गरेको छ। समय समयमा बाटोमा लाखौं रुपैयाँ बराबरको बुद्धचित्त लुटिने गरेको छ। केही समय पहिले लुटिने डरले व्यापारीले त्यसको बचाउनका लागि हेलिकोप्टरबाट समेत बुद्धचित्त ढुवानी गरेका थिए।
यता वन कार्यालयले भने बयर प्रजातिको भन्दै बुद्धचित्तको प्रतिकिलो आठ रुपैयाँ मूल्यांकन गरी त्यसको १३ प्रतिशत राजस्व संकलन गर्दै आएको छ। वनस्पती विज्ञानमा जिजिफस बुद्धान्सिस’ नाम दिएको यो बोटमा ससाना दाना फल्छन् जुन बौद्ध लामाहरूले पवित्र मालाका रूपमा प्रयोग गर्छन्। अचेल फेसनका रूपमा तन्नेरीहरूले पनि लाउन थालेका छन् ।

पछिल्ला वर्षहरूमा भारत, चीन, सिंगापुर, जापान र कोरियामा समेत बुद्धचित्तको माग बढेपछि यसको मुल्य सोचेभन्दा धेरै भएको स्वय तिमाल बासी बताउछन् ।काभ्रेको तिमालमा मात्र पाइने बुद्धिचित्तलाई व्यवस्थीत गरे आम्दानीको राम्रो श्रेत बन्नसक्ने स्थानीय बताउछन् ।

गाईलाई भन्दा दुर्लभ एकसिङ्गे गैँडालाई राष्ट्रिय जनावर बनाउनपर्छ भन्नुभयो

बनेपा-तामाङ समुदायको बाहुल्यता रहेको काभ्रेपलाञ्चोकमा राष्ट्रिय जनावरका रुपमा गाईलाई मान्न अस्वीकार गरिएको छ ।

काभ्रेपलाञ्चोकको काशिखण्ड नगरपालिका भकुण्डेमा भएको नेपालको संविधान, २०७२ को प्रारम्भिक मस्यौदामाथिको सुझाव सङ्कलनमा तामाङ समुदायका अधिकांश व्यक्तिले गाईलाई राष्ट्रिय जनावारका रुपमा स्वीकार गर्न सकिन्न भने ।

भीमखोरी गाविसका शङ्खबुद्ध लामाले गाई र सुँगुरमा तात्विक अन्तर नभएको उल्लेख गर्दै जनावर सबै एउटै हुन् र कुनै जनावरप्रति पनि विभेद गर्नु हुन्दैन भन्नुभयो । उहाँले बुद्ध जन्मेको देश भनेर प्रस्तावनामा राख्न सुझाव दिँदै आफू बुद्ध धर्म मान्ने भएकाले काटमार गर्नु हुन्दैन भन्ने मान्यता राख्छु भन्नुभयो ।

पोखरी नारायणस्थान गाविसका खड्गबहादुर लामाले मुलुक धर्म निरपेक्षतामा गएकाले गाई काटेर खान सुरु भएको जिकिर गर्दै गाईको विषयमा विवाद भएकाले बरु विश्वमा दुर्लभ मानिएको एकसिङ्गे गैँडालाई राष्ट्रिय जनावर बनाउनपर्छ भन्नुभयो । उहाँले भाषा आयोगले सिफारिस गरेका अन्य भाषालाई समेत सरकारी कामकाजको भाषा बनाउनुपर्नेमा जोड दिँदै संसदीय सुनुवाइको प्रावधान गलत भएको बताउनुभयो ।

मेच्छे गाविसका डिलबहादुर थोकरले जिरेल र तामाङ समुदायमा विवाह गर्दा गाईको मासु नै आवश्यक हुने भएकाले राष्ट्रिय जनावरका रुपमा गाईलाई राख्न नहुने जिकिर गर्दै राष्ट्रिय जनावर संविधानमा उल्लेख गर्नु पर्दैन भन्नुभयो ।

उहाँले राष्ट्रिय झन्डाले समेत सबै भाषा, भाषी, धर्म, संस्कृतिको समेत प्रतिनिधित्व नगर्ने भएकाले परिवर्तन गर्नुपर्नेमा जोड दिनुभयो । काशिखण्ड नगरपालिकाका हरिप्रसाद तिमिल्सिनाले गाउँघरमा मासु काटेर भागबन्डा गरेजस्तो स्याउले भागबन्डाको संविधान आउन लागेको आरोप लगाउँदै सबैलाई चित्त बुझाउने हिसाबले प्रस्तावनासमेत लामो गराइएको टिप्पणी गर्नुभयो । ५ साउनमा प्रकाशित अनलाइन खबरवाट

नुवाकोटका एक वृद्धाले आफू संसारकै ज्येष्ठ नागरिक रहेको दाबी गरेका छन्

थानसिंग गाविस–८ आपचौरका बाटुली लामिछाने अहिले ११२ वर्ष चार महिनाको हुनुभयो । उहाँले २०७० सालमा जिल्ला प्रशासन कार्यालय नुवाकोटबाट लिनुभएको नागरिकता प्रमाणपत्रमा जन्म मिति विसं १९५७ चैत १० गते उल्लेख छ ।

अझै हट्टाकट्टा रहनुभएका बाटुली लामिछाने बिहान बेलुका घाँस काट्नेदेखि आफ्नो दैनिक कामकाज आफैँ गर्दै आउनुभएको छ । उहाँको दैनिकी देख्नेहरुले ११२ वर्ष चार महिनाको उमेर पत्याउनै मुस्किल हुने गरेको छ । अझै बोली प्रष्ट रहेको उहाँलाई कुनै ठूलो रोग नरहेको ७६ वर्षीया कान्छो छोरा नेत्रप्रसाद लामिछाने बताउनुहुन्छ । “आँखा देख्नुहुन्छ, कान सुन्नुहुन्छ, कसैको सहाराबिनै ठमठमी हिँड्नुहुन्छ” नेत्रप्रसादले भन्नुभयो । उहाँका अनुसार अझै बाटुलीले दैनिकजसो घाँससमेत काट्ने गर्नुहुन्छ ।

एक सय १२ वर्षीया जापानी नागरिक साकारी मोमोयीको निधन भएपछि लामिछाने परिवारले ११२ वर्ष चार महिनाका बाटुली संसारकै जिवित ज्येष्ठ नागरिक रहेको दाबी गरेका छन् । सिन्धुपाल्चोकको गिरानीचौरमा जन्मनुभएका बाटुली विवाह गरेर नुवाकोट आउनुभएको हो । उहाँका चार सन्तानमध्ये अहिले कान्छो छोरामात्रै जीवित हुनुहुन्छ । दुई छोरी र एक छोराको निधन भइसकेको छ । बाटुलीको जेठो पनाति श्यामप्रसाद ढुङ्गानाको उमेर नै २३ वर्ष भइसकेको छ । उहाँ अहिलेसम्म निरोगी रहेको परिवारले बताएको छ ।

बाह्र वर्षअघि टाइफाइड ज्वरो आए पनि त्यसपछि कुनै रोगको सङ्क्रमण नरहेको नातिनी ज्वार्इं नवराज न्यौपानेले बताउनुभयो । साथै ११२ वर्षीया जापानी नागरिकको निधन भइसकेकाले बाटुली संसारकै ज्येष्ठ नागरिक रहेको समेत न्यौपानेले दाबी गर्नुभएको छ । कपाल सेताम्मे फुलिसकेको बाटुली असाध्यै टाठोसमेत हुनुहुन्छ । गाउँघरका आफन्त छिमेकीसँग बोलचालदेखि एँेचोपैचोसमेत गर्न भ्याउनुहुने बाटुली गाउँभरिका लागि जीवित देवताजस्तै सम्मानित रुपमा रहँदै आउनुभएको छ । छिमेकी अर्जुन हुमागार्इंका अनुसार उहाँको स्मरण शक्ति र बोलीचालीमा कुनै कमी आएको छैन ।

बिहान उठेर नुहाइधुवाइ गर्नेदेखि पूजापाठ, घाँस काट्नेसम्मको नित्य कर्ममा लागिरहनुभएका बाटुलीले अहिलेसम्म डाक्टरी औषधि सेवन गर्नुभएको छैन । “अहिलेसम्म ओखती खानुपरेको छैन, आफ्नो काम म आफैँ गर्न भ्याउँछु,” बाटुलीले भन्नुभयो – “मलाई हिँडडुल गर्न, घाँस काट्न पनि केही गाह्रो भएको छैन ।” कुनै ठूलो र प्रभाव पार्ने रोग अहिलेसम्म शरीरमा नहरेको बाटुलीले अझै तन्दुरुस्तीका साथ जीवन बिताउनुहुने चिनेजानेकाहरुको अनुमान छ ।

गत वैशाखमा गएको भूकम्पका बेला घरको फलैचामा बसिरहनुभएकी बाटुलीलाई यो पालिको भूकम्पको पत्तै भएन । बरु उहाँलाई ९० सालको भूकम्पले अहिलेसम्म हल्लाइरहेको छ । “यसपालिको भइँचालो त पत्तै भएन, ९० सालमा त बेस्सरी हल्लिएको थियो” बाटुलीले भन्नुभयो । उहाँले अहिलेसम्म नेपालमा भएका सबै निर्वाचनमा भाग लिनुभएको छ । पञ्चायतकालका सबै निर्वाचनदेखि दोस्रो संविधानसभा निर्वाचनमा समेत बाटुलीले उत्तिकै सक्रिय र उत्साहका साथ मतदान गर्नुभएको छ । रासस

बिहे भएको धेरै सालपछि सहोदर दिदी भाइ रहेको रहस्य सार्वजनिक

ब्राजिलको साओपवलामा बस्ने ३९ वर्षीया एड्रियाना र उनका पति ३७ वर्षीय लियोनार्दो सात वर्ष देखि विवाहित छन् । उनीहरुको ६ वर्षकी छोरी पनि छिन् । तर, धेरै वर्ष देखि वेपत्ता आमाको खोजि गर्ने क्रममा उनीहरु सहोदर दिदी भाइ रहेको रहस्य सार्वजनिक भएको छ ।

एड्रियाना र लियोनार्दोको प्रेम विवाह भएको थियो । एक अर्कालाई आफ्नो थर नभनीकन प्रेम सम्बन्धमा परेका यी जोडी विवाह गरी सँगै बस्न थाले । दुवै जना आफ्नीि आमा मारियाको खोजीमा थिए । एक पटक विवाह गरिसकेकी एड्रियानाले बैबाहिक सम्बन्ध टुटेपछि १० वर्ष अँघि लियोनार्दोसँग भेटिन् ।

उनीहरु एकअर्कासँग नजिकिए र सँगै बस्न थाले । तर उनीहरुले भित्र भित्रै आफ्नी आमाको खोजि जारी राखेका थिए । एड्रियानाले स्थानीय रेडियोमा सम्पर्क गरि उनकी आमासँग भेट्ने ब्यवस्था मिलाइन् । हराएका आफन्तको खोजिमा विशेष कार्यक्रम चलाउने उक्त रेडियोको लाइभ कार्यक्रममै आमाले आफ्नो लियोनार्दो नामको छोरो समेत रहेको बताएपछि उनीहरु छाँगा बाट खसेजस्तै भए ।

हराएका आफ‌न्तहरु एकाएक भेटिँदा एक प्रकारको यौनिक आकर्षण रहने एउटा स्वास्थ्य समस्या भएकाले एड्रियाना र लियोनार्दोबीचको सम्बन्ध पनि त्यसकै परिणामस्वरुप भएको हुन सक्ने चिकित्सकहरुको अनुमान छ ।अहिले आफूहरु दिदी भाइ भएको थाहा पाएपछि पनि एड्रियाना र लियोनार्दोसँगै बसिरहेका छन् ।

नेताज्यू नेपालमा जन्मेर अभागी भइयो भन्ने सोंच्न बाध्य नपार्नोस –ऋचा ढुंगाना

 तपाइँहरु को हो ? किन आउनुभएको ? होटल र रिसोर्टका मिटिङहरु के का लागि थिए, कसैलाई मन्त्री बनाउन मात्रै थियो ? यत्रो वर्ष के गर्नुभयो ? यदि संविधान बनाउन हामीले सुझाव दिनु पर्ने हो भने तपाइँहरु ६०१ जना किन चाहियो ? तपाइँहरु अयोग्य हुनुहुन्छ । सक्षम नभए अरुलाई जिम्मा दिनुपर्छ । संविधान बने सबै हुन्छ भनेर भ्रम फैलाउने काम गरिएको छ, त्यो हो त ? के संविधान बनाएपछि सबै समस्या समाधान हुन्छ  ? होईन राजनीतिक नेताहरुले आफ्नो असक्षमता लुकाउन यस्तो भ्रम फैलाएका छन् ।
देश हाँक्ने राजनीतिले हो तर हाम्रो त मूल नै दुषित छ, मूल दुषित भएपछि सफा पानी आउन्न ।  देशमा काम पाउने वातावरण छैन, मेरो दाइले इञ्जिनियर पढ्यो, तपाइँले रोजगारी दिनुभएन । दाईलाई फ्रान्सले लग्यो । रोजगारी दिने काम तपाइँहरुको हो । कोही पनि नेपाली विदेश जान चाहन्न, आफ्नो बाबु, आमा, परिवार र देश छोडेर जाने रहर कसैलाई हुँदैन । यो बाध्यता हो, र यो सबै तपाइँ नेताहरुले गर्दा भैरहेको छ । लोडसेडिङ बढिरहेको छ, हामीले पढ्न पाईरहेका छैनौं, तपाइँहरुलाई मतलव छैन, तपाइँहरुको घरमा जेनेरेटर होला, त्यसैले तपाइँहरु हाम्रो समस्या बुझ्नु हुन्न । मलाई कहिले काहीँ म किन अमेरिकामा जन्मिनँ ? किन नेपालमा जन्मे भन्ने लाग्छ । यो रहर होईन, यो सोंच्न बाध्य पारेको तपाइँ नेताहरुले हो । मुलुक राजनीतिले चलाउने हो तर राजनीतिमा तपाइँहरुले यति लापरवाही गरिरहनुभएको छ ।
ca
पख्नोस पख्नोस तपाइँहरुले यत्रो वर्ष लगाउनुभयो हाम्रो कुरा चार घण्टा पनि तपाइँले नसुन्ने ? ( छिटो टुंग्याउन आग्रह गर्ने सभाषद दीपक कुइँकेलको आग्रह प्रतिवाद गर्दै ) हाम्रो मुलुकको समस्या संविधान नबन्नु हो भनिँदैछ, होईन संविधान नआउनु हाम्रो समस्या होईन, हाम्रो समस्या नेता असक्षम हुनु हो, राजनीतिमा असक्षम मान्छे आउनु हो, तपाइँ अरु असक्षम हुनुहुन्छ । डाक्टर बन्नलाई योग्यता चाहिने, ईञ्जिनियर बन्नलाई योग्यता चाहिने , तर नेता बन्नलाई कुनै योग्यता नचाहिँने ? हामीले राजनीतिमा कति लापरवाही गरिरहेका छौं ?
vidya
यहाँ बोल्ने धेरैले धर्मको कुरा गर्नु भयो, संघीयताको कुरा गर्नुभयो, के संविधान बनाउने भनेको संघीयता र धर्मको कुरा मात्रै हो ? खोई त मुलुकको विकास र समृद्धिको कुरा गरेको ? संविधान मूल कानून हो, यसले देशको विकास गर्नुपर्छ, यसले देशलाई समृद्धि दिनुपर्छ । नेताहरु धर्मको कुरा गरिरहेका छन, अनि हामी त्यसैको पछाडि लागेर हिडिरहेका छौं । म भन्न चाहान्छु –मुलुकमा प्रत्यक्ष निर्वाचित राष्ट्रपति हुनुपर्छ । चाहे एक पेजको संविधान आओस त्यसले मेरो अधिकार सुरक्षित गरेको हुनुपरयो ।
(सोमवार कोटेश्वर महादेवस्थानमा संविधानको मस्यौदामा सुझाव संकलन गर्न आयोजित कार्यक्रममा ढुंगानाले व्यक्त गरेको विचार )
काठमाण्डौको कोटेश्वर महादेवस्थानमा सोमवार एमाले उपाध्यक्ष एवं सभाषद विद्यादेवी भण्डारी र नेपाली काँग्रेसबाट निर्वाचित सभाषद दीपक कुइँकेल सहभागी संविधानको मस्यौदामाथि सुझाव संकलन कार्यक्रममा सोमवार ढुंगानाले नेताहरुप्रति निकै आक्रोश व्यक्त गरिन् । देश बिगारेको नेताहरुले नै हो भन्ने उनको ठम्याई छ ।  संभवत उनले बोल्दा हल सबैभन्दा बढी तालिले गुञ्जियो । त्यसो त कार्यक्रममा अरु सहभागीले पनि राजनीतिक दल र नेताप्रति आक्रोश व्यक्त नगरेका होईनन, तर ऋचाको उमेर, उनको प्रस्तुति  र प्रश्न चर्चाको विषय बन्यो । उनले मञ्चमा बसेका नेताहरुलाई सिधै सोधिन–तपाइँहरु को हो र किन यहाँ आएको ? यसले किशोर र युवाहरुमा नेताप्रति अरु भन्दा बढी आक्रोश छ भन्ने देखाउँछ, ऋचा त प्रतिनिधि पात्र मात्रै थिइन । उनको कुरा सुनेपछि एभरेष्ट दैनिक डटकमले ऋचासँग आक्रोशको कारण लगायतका विषयमा केन्द्रीत रहेर कुरा कानी गरेको छ–
कति वर्ष हुनुभयो ?
१६ वर्ष भएँ ।
कतिमा पढ्नुहुन्छ ?
मैले सीसीआरसीबाट १२ कक्षाको परीक्षा दिएकी छु ।
आज कार्यक्रममा आएका को को नेतालाई चिन्नुहुन्छ ?
विद्या भण्डारीलाई चिन्छु । मेरो आँखा अलि खराब छ, आज चश्मा पनि लगाइँन अरुलाई चिनिनँ पनि  । तर अरु नेता सभाषद पनि हुनुहुन्थ्यो, त्यसैले बोलें ।
किन यति धेरै आक्रोश नेताहरुप्रति ?
अहिले देशको स्थितिको मुख्य कारण नै नेताहरु नै हो । युवाहरुले जे भोगिरहेका छन, सबै नेताले गर्दा हो,आक्रोश त आउने नै भयो । मैले मौका पाएर बोलें, अरुले बोलेको भएपनि मैले जत्तिकै बोल्थे, म भन्दा कम बोल्थे भन्ने मलाई लाग्दैन् ।
किन नेताहरुले देश बिगारे भन्ने लाग्यो  ?
अहिले यो प्रोगामका लागि एक अर्ब रुपैयाँ खचै भैरहेको छ ।  केही युजफुल देख्नुभयो तपाइँले ? उहाँहरुले दुई–दुई पटक संविधान सभाको चुनाव गरेर यत्रो वर्ष, यत्रो मिटिङ गर्नुभयो तर पनि कस्तो संविधान बनाउँदा नागरिक खुशी हुन्छन, देश विकास हुन्छ भनेर बुझन सक्नुहुन्न भने उहाँहरु किन बस्नु भयो । किन सभाषद बन्नुभयो ? जो सक्षम थियो उहाँहरुलाई दिनुपथ्र्यो ।
तर यो सुझाव संकलन कार्यक्रमलाई नागरिकका कुरा परे परेनन ? ल हेर, सुझाव देउ भनेर बुझन आएको भनेर बुझ्न सकिँदैन र ?
त्यस्तो होईन, मलाई त अहिले पनि संविधान आउँछ जस्तो लाग्दैन, उहाँहरुले फेरि पनि हात्ती आयो हात्ती आयो फुस्सा भने जस्तै गराउनुहुन्छ जस्तो लाग्छ । उहाँहरुमा अलि कति पनि देशभक्तिको भावना भएको भए संविधान आईसक्थ्यो । उहाँहरुले सेक्रिफाईस गर्न सक्नुहुन्थ्यो । किन उहाँहरु खालि यो प्रधानमन्त्री भयो भने मात्रै यस्तो हुन्छ भन्नुहुन्छ ? उहाँहरुले किन सेक्रिफाईस गर्न सक्नुहुन्न ? खोई त उहाँहरुमा ‘प्याट्रियाटिज्म’ ? अहिले हामी संविधान–संविधान मात्रै भनिरहेका छौं, के संविधान आएपछि सबै समस्या समाधान हुन्छ ? विकास खोइ त ? संविधान त एउटा मूल कानून मात्रै न हो । संविधान बनाउन यत्रो टाईम लाग्छ भने विकास कहिले गर्ने हो ? अर्को कुरा संविधान पहिलो चोटी बन्न लागेको पनि होईन, कानून त पहिले पनि थिए त ।  न कानून लागू हुन्छ , न केही हुन्छ । संविधान आउँदैमा मात्रै केही हुन्छ भन्ने होईन, मलाई प्राक्टिकल कुरा चाहियो , विकास चाहियो म त्यसमा सन्तुष्ट हुन्छु ।
नेताले के गरिदिए हुन्छ भन्ने लाग्छ तपाइँलाई  ?
उहाँहरुले म भन्दा पनि हामी भनेर सोच्नु पर्यो । आफुनो स्वार्थ भन्दा देश र जनताको लागि मैले केही गर्नुपर्छ भनेर देश–जनताको हित र अधिकार समेटेर संविधान ल्याउनु पर्यो । देशको विकास होस, देशमा जन्मेर अभागी भईयो भनेर सोंच्न नपरोस ।
richa
धेरै पेजको संविधान बनाउँदैमा राम्रो हुन्छ भन्ने होईन । सबैले अधिकार पाउन , महिला अहिले पनि पिछडिएका छन, पढ्न पाइरहेका छैनन, यस्ता कुरा ध्यान दिनुपर्यो । ढुकुटीको दुरुपयोग नहोस ।  मलाई त आजको कार्यक्रममा लगाउने पैसा एउटा हाइड्रो पावरमा लगाएको भए एक घण्टा त लोडसेडिङ कम हुन्थ्यो भन्ने लाग्छ । म जन्मिँदा उहाँहरुनै नेता हुनुहुन्थ्यो ।  म यत्रो भैसके उहाँहरुनै नेता हुनुहुन्छ । १८–२० वर्ष अघिको सोच अहिलेका लागि ठीक नहुन पनि सक्छ ।  हामी युवाको कुरा नुबझ्ने अनि कसरी हुन्छ ? युवाको कुरा बुझ्नु पर्यो ।
यही कुरा बोल्छु भनेर तयारी गरेर यहाँ आउनुभएको थियो कि यहाँ आएपछि बोल्न मन लाग्यो ?
म यो कुरा बोल्छु भनेर आएको होइन, । म त एजुकेशन लोनका विषयमा कुरा राख्छु भनेर आएकी थिएँ । भारत लगायत अरु देशमा पनि एजुकेशन लोन छ, युवाको यसमा इन्ट्रेस्ट पनि छ । ती देशमा विद्यार्थीले लोन पाउँछन, हामीलाई पनि लोन दिए हुन्थ्यो भन्ने हो । हामीले फ्रिमा पढाउ पनि भनेको छैन, हामी जागीर खाएपछि सक्षम भएपछि तिर्छौं अहिले लोन देउ भन्न आएकी थिएँ । शुरुमा बोल्न पाएको भए  एडुकेशन लोनको कुरा भनेर जान्थें ।  तर कार्यक्रममा बसेर सुन्दै जाँदा हिन्दु धर्म र प्रदेशको कुरा मात्रै आयो, त्यसपछि म मा पनि अलि आक्रोश आयो अनि मैले बोले । अरुले गर्दा पनि मैले यो बोल्नु पर्ने स्थिति आयो । फेरि हामीले सितिमिति बोल्न पनि पाउँदैनौ, म बेला बेला घरमा पनि केही प्रोब्लेम पर्यो भने कराई राख्थें, ममीले ‘मलाई नभन नेता भएको ठाउँमा गएर भन’ भन्नुहुन्थ्यो, आज मौका पाएँ अनि बोलें । साभार -अनलाइन खबर

खुकुरी प्रहारबाट राप्रपा नेपाल सभासद गणेश थापा घाइते

५ साउन । खुकुरी प्रहारबाट राप्रपा नेपाल सभासद गणेश थापा घाइते हुनु भएको छ ।गणेश थापाको खुकुरी प्रहारबाट टाउकोमा चोट लागेको छ  । मस्यौदा सुझावको विरोध गर्न हेटौडामा गएका थापा माथी स्थानिय युवाहरुको एक समूहले खुकरी र रड प्रहार गरेको प्रहरीले बताएको छ । हिन्दु राष्ट्रको कायम हुनु पर्न भन्दै सुझाव संकलनका क्रममा आफ्नो मन्तव्य दिदै गर्दा उनीमाथि आक्रमण भएको राप्रपा नेपालले जनाएको छ ।

बजरङ्गी भाइजानका बाल कलाकार मुन्नी बन्न १ सय जनासँग प्रतिस्पर्धा गरेकी थिइन

५ साउन । सलमान खानको फ्लिम बजरङ्गी भाइजान पक्कै पनि तपैले हेरिसक्नु भएको होला । सोहि फ्लिममा मुन्निको भूमिकामा अभिनय गरेकी सानी परी जस्ती बालीकाको बारेमा तपाईँ हामी धेरैलाई पत्तो नहुन सक्छ ।
सानी परी जस्ती बालीकाको नाम हर्षाली मल्होत्रा हो । दिल्लीमा बस्दै आएकी उनी सात वर्षकी भइन । यसअघि सानो पर्दामा काम गरिसकेकी उनले फिल्म बजरङ्गी भाईजानको लागि हर्षालीले १ सय जनासँग प्रतिस्पर्धा गरेकी थिइन । सबैलाई पछि पार्दै हर्षाली फिल्मका लागि छनौट भइन र सलमानसँग काम गर्ने मौका पाईन् । हर्षाली यो भन्दा पहिले पनि टेलिभिजन शोहरुमा पनि देखा परिसकेकी छन् । उनले लाईफ ओकेको दैनिक शो लौट आओ तृषा र जि टि भि को दैनिक शो कबुल हैमा पनि काम गरिसकेकी छन् । चलचित्र बजरङ्गी भाईजानको सफलतासँगै उनको पनि अभिनय यात्रा सफलतातर्फ उन्मुख भएको मान्न सकिन्छ । यसका साथसाथै हर्षालीले पि अरस र फेयर एण्ड लवलीको बिज्ञापनमा पनि काम गरेकी छन् । बन्न

क्यान्सर रोगका विरुद्ध अत्यन्तै हितकारी फल पत्ता लगाए

बैज्ञानिकहरुले अष्ट्रेलियामा क्यान्सर रोगका विरुद्ध अत्यन्तै हितकारी फल पत्ता लगाएका छन् । ब्रिस्बेन शहरस्थित ‘क्युआइएमआर’ बर्घोफर मेडिकल रिसर्च इन्स्टिच्युटका ग्लेन बोय्लेले नेतृत्व गरेका अनुसन्धानकर्ताहरुले यो कुरा पत्ता लगाएका हुन् । उनीहरुले यो फलका बारेमा भर्खरै ८ वर्ष लामो अध्ययन पुरा गरेका हुन् । शुदुर उत्तरी क्विन्स्ल्याण्डमा यो फल फल्ने गर्दछ ।यसको प्रयोगले घाँटी, अनुहारको ट्युमर र छालाको क्यान्सरलाई पुरै नष्ट पार्दछ । ‘ब्लुसउड’ रुखमा यो फल फल्ने गर्दछ । यसको बैज्ञानिक नाम ‘हिल्याण्डीया डकरिली’ हो । यसलाई यहाँका स्थानिय जनजातीहरुले ‘एकदमै छिटो काम गर्ने औषधी’को रुपमा चिन्ने गर्दछन् । यो फलमा प्राप्त भएको तत्वलाई निकालेर अहिले औषधी बनाइएको छ । र यो औषधि बिरालो, कुकुर र घोडा लगायतका ३०० प्रकारका जनावरहरुमा प्रयोग गरिसकिएको छ ।
यी जनावरहरु सतही खालका क्यान्सरबाट पिडीत थिए । जेसिका भोन्डेरेनका अनुसार ३०० मध्ये ७५ प्रतिशत जनावरहरुको ट्युमर हरायो । बैज्ञानिकहरुका अनुसार यो औषधि जनावरहरुका लागि त एकदमै प्रभावकारी र छिटो पनि छ। पाँच मिनेटमै यसले प्रभावकारी असर देखाउन थाल्छ ।
एक हप्तादेखी १५ दिनसम्ममा ट्युमर पुरै निको भएको देखियो । तर दुखको कुरो यो बेरी जस्तो पायो मौषम र स्थानमा नफल्ने देखिएको छ । रिसर्च टिमका प्रमुख बोय्लेका अनुासर अब छिटै मानवका लागि पनि यो औषधी निर्माण गरिँदै छ ।

संविधानको मस्यौदामा सुझाव लिन आफ्नो निर्वाचन क्षेत्र गएको प्रचण्ड माथि ढुंगा को बर्षा

सिरहा, साउन ४- एमाओवादी अध्यक्ष एवं सिराहा क्षेत्र नम्बर–५ का सभासद पुष्पकमल दाहाल सोमबार संविधानको मस्यौदाको सुझाव संकलन गर्न आफ्नो निर्वाचन क्षेत्र आउने कार्यक्रम थियो।
मिर्चैयास्थित मोहन उच्चमाविमा सुझाव संकलनको कार्यक्रम राखिएको थियो।
अध्यक्ष दाहाल हेलिकोप्टरबाट सिधै मोहन उच्चमावि आउने कार्यक्रम थियो। तर दाहाल आउने थाहा पाएका आन्दोलनरत दलले संघीय समाजवादी फोरम नेपालका सभासद वीरेन्द्र महतोको संयोजकत्वमा एउटा कमिटी नै गठन गरेका थिए। उनीहरुले दाहाल आउनुपुर्व हेलिकोप्टर ल्याण्ड गर्ने ठाउँमा टायर बाल्न सुरु गरिहाले।

सो कुरा जानकारी पाएका दाहाल लाहानमा हेलिकोप्टर ल्याण्ड गरेर लाहानबाट मिर्चैया गाडीमा आएका थिए। दाहाल आउने वित्तिकै आन्दोलरत दलले कालोझण्डा देखाउन सुरु गरे। सुरुमा कालोझण्डा देखाएका आन्दोलनरत दलले दाहाल मञ्चमा बढ्ने वित्तिकै ढुंगा मुडा वर्षाउन थाले।

संविधानको मस्यौदामा सुझाव दिन आएका सर्वसाधारण आतंकित हुने गरी आन्दोलनरत दलले विरोध गरेपछि प्रहरीले हस्तक्षेप गर्यो। दुईतर्फी झडपमा डिएसपी माधव बुढाथोकीसहित सात प्रहरी घाइते भएको एसपी रामत्रिपाल साहले जानकारी दिए। विरोधी दलका कार्यकर्ताले मञ्चमा ढुंगामुढा वर्षाउन थाले
नागरिक
पछि दाहाललाई प्रहरीले सुरक्षा ुकवचुमा राखेको थियो। विरोधीले आक्रमण गर्न नछोडेपछि दिनभरीको कार्यक्रम लिएर आएका दाहाल करिब आधाघण्टा भाषण गरेर काठमाडौं फर्किए। Photo Annapurna Post.

झोलुङ्गे पुलबाट हाम फालेर २५ वर्षीय एक युवकले आत्महत्या

जुम्ला, ३ साउन । गएराति सदरमुकाम नजिकको झोलुङ्गे पुलबाट हाम फालेर २५ वर्षीय एक युवकले आत्महत्या गरेका छन् ।

हत्या गर्ने युवक चन्दननाथ– १५ बोहोरागाउँ निवासी २७ वर्षीय वसन्त रावल हुन् । रावलले झोलुङ्गे पुलको बीचबाट हाम्फालेको प्रत्यक्षदर्शीले देखेपछि प्रहरीलाई जानकारी गराएका थिए ।

बेलुकाको समय, वर्षाले पानीको चाप बढी भएकाले सोही दिनमा खोजी कार्यमा अवरोध आएको र आज सदरमुकामदेखि नौ किमी टाढा रहेको हाकु गाविस नजिक मृतक रावलको शव भेटिएको प्रहरी निरीक्षक प्रेमबहादुर खड्काले जानकारी दिनुभयो । मृतक रावलको कर्णाली स्वास्थ्य विज्ञान प्रतिष्ठान शिक्षण अस्पताल, जुम्लामा शव परीक्षण गरिसकिएको प्रहरी निरीक्षक खड्काले उल्लेख गर्नु भयो ।

यसैगरी प्रहरी निरीक्षक खड्काका अनुसार आज चन्दननाथ नगरपालिका वडा नं १२ तिलउम गाउँका ३५ वर्षीया विष्णु सार्कीले आफ्नै घरमा पटुकाको पासो लगाएर आत्महत्या गरेकी छन् ।

श्रीमान्सँगको सामान्य विवादमा विष्णुले आत्महत्या गरेको बताइएको छ । आत्महत्याको खबर बेलुका आएपछि राति उनलाई अस्पतालमा पु¥याइएको र निजको शव परीक्षण हुन नसकेको जिल्ला प्रहरी कार्यालय जुम्लाले जानकारी दिएको छ । घटना के कति कारणले भएको हो भन्ने विषयमा अनुसन्धान भइरहेको प्रहरीले जनाएको छ ।

आफ्नै दाजुभाइलाई लुट्नेहरुले अब लाज मान्नु पर्छ : श्रम राज्यमन्त्री गुरुङ

मन्त्री गुरुङले गरेको निर्णय कामदारका पक्षमा देखिएका कारण मुलुकभर उनको पक्षमा बहसगरिदैं छ । तर व्यावसायीहरु गुरुङका कारण वैदेशिक रोजगारी खोसिने दाबी गर्दैैछन् । सरकारको निर्णय नमानेर अटेर गर्ने व्यावसायीलाई सरकारले कारवाही गर्ने मन्त्री गुरुङको दाबी छ । प्रस्तुत छ, ईमेजखबर डटकमका लागि ठाकुर बेलवासेले मन्त्री गुरुङसँग गरेको वार्ताको केही महत्वपूर्ण अंश :

सरकारको निर्णय नमान्ने भन्दै वैदेशिक रोजगार व्यावसायीहरु आन्दोलनमा छन् । व्यावसायीहरु आन्दोलनमै जानुपर्ने यो कस्तो निर्णय गर्नुभयो तपाईले ?

मैले पनि केही बुझन सकिरहेको छैन । सरकारले वैदेशिक रोजगार व्यावसाय संचालन गर भनेर अनुमतिपत्र दिएको छ । सरकारको निगरानीमा उनीहरु बस्नु पर्छ । सरकारले दिएका निर्देशन पनि पालना गर्नु पर्छ । यो उनीहरुलाई मैले बुझाइरहनु पर्ने कुरै होईन ।

अहिले खाडीमा काम गर्न जाने युवाहरु गरिब नेपालीका छोराहरु हुन् । ऋण काढेर खाडी गएका छन् । खाडीका राम्रा कम्पनीहरुले निःशुल्क प्रवेश अनुमतिपत्र र टिकट दिने गर्छ । तर हाम्रा व्यावसायीहरु खुलेआम उताका कम्पनीहरुलाई कमिशन खुवाउँछन् र नेपालीलाई लुट्छन्, यो कस्तो बिडम्बना ? यसैलाई नियममा बाधौँ, व्यवसायलाई अनुशासित बनाऔँ भन्ने मेरो पहल हो ।

नेपाली ठगीएका छन्, वैदेशिक रोजगार व्यावसाय अनुशासित छैन भन्ने कुरा बुझ्न किन यति ढिलो ?

हो, उहिल्यै गर्नुपर्ने काम अहिले आएर गरिदैं छ । विदेश जाने काम यतिबेला फेशनजस्तो भएको छ । सरकार पनि रेमिट्यान्सका नाममा मख्ख छ । तर यसका घाटा हामीले कहिल्यै हेरेनौं । यो दुःखको कुरा हो । हाम्रा रोजगार व्यावसायीहरु एजेन्टमात्र हुन् । नेपालको परिस्थितिले उनीहरु व्यावसायी बने । कतार, मलेसिया लगायतका राम्रा कम्पनीहरुले कामदारलाई निःशुल्क भिषा र टिकट पठाउँछन् ।

अनि नेपाली म्यानपावर कम्पनीलाई कमिशन पनि दिन्छन् तर हाम्रा व्यावसायी भनिने कम्पनीहरुले उताका काम नलाग्ने कम्पनीहरुलाई कमिशन ख्वाएर मान्छे उता पठाए । यसले नेपालीले खाडीमा दुःख त पाए नै, अर्कोतर्फ देशको ठूलो रकम विदेश गयो । यो राज्यका लागि चिन्ताको विषय हो । विगतमा के भएन, के भयो भन्नेभन्दा पनि अब राम्रो गरौं भन्नु पर्यो नि ।

नेपाली कामदारबाट लिएको मोटो रकम त रोजगार कम्पनी र यहाँका व्यावसायीले बाँडीचुँडी पो खान्छन् ?

म यस व्यावसायसँग राम्रो भिजेको मान्छे । प्रत्यक्ष मैले काम पनि गरेको छु । यसकारण यहाँ भित्र विकृति के छन् भन्नेबारे सबै मलाई थाहा छ । मलाई कसैले सिकाउनु पर्दैन । केका लागि आन्दोलन गर्दैछन् साथीहरु ? म अचम्ममा परेको छु । लुट्न पाईनँ भनेर आन्दोलन गर्ने ?

अब रोजगारीका लागि खाडी जान चाहनेले कुन निकायसँग सम्पर्क राख्ने त ?

वैदेशिक रोजगार कम्पनीसँगै हो नि सम्पर्क गर्ने । उनीहरुलाई त्यही काम गर भनेर नेपाल सरकारले अनुमतिपत्र दिएको छ ।

कमाई खोसिएपछि नेपालका रोजगार व्यावसायीले कसरी कामदारलाई विदेश पठाउने ?

यही त छ बिडम्बना । कति कमाउने ? एकजना गरिबको छोरालाई कति लुट्ने ? निःशुल्क प्रवेश अनुमतिपत्र र टिकट कामदारका नाममा आउँछ । जुन देशको कम्पनीले कादार माग गर्छ, उसैले पनि कमिशन दिन्छ । यताबाट प्रति कामदार १० देखि १५ हजार सेवा दिएबापत लिनसक्ने अवस्था पनि छ । यसरी दुबै तर्फबाट प्रतिकामदार कम्पनीले कम्तीमा २५ हजार कमाउँछ । अब मैले नबुझेको कुरा कति कमाउनु पर्ने हो उनीहरुले ? यहाँबाट ठगिएर खाडी गएका युवाहरुले हामी ठगिएका रहेछौं भन्ने थाहा पाउँछन् । यहाँका कम्पनीहरुलाई सरापेर बस्छन् । आफ्नै दाजुभाइको सराप कति खानु हो ?

अहिलेसम्म त यो क्षेत्र मनोमानी कै रहेछ नि त ?

हो, यति धेरै मनोमानी छ कि कुरै नगरौं । म त यस क्षेत्रको भुक्तमान हुँ । मैले कुनै हचुवाका भरमा निर्णय गरेको छैन । अति भएपछि यो कदम चाल्न बाध्य भएको हुँ ।

पैसाका नाममा नेपाली युवा माथि खेलवाड गर्ने अधिकार कसैसँग छैन । अहिले खाडीका देशहरुमा नेपालीको विजोग किन छ भन्दा कमिशन खुवाएर नेपाली म्यानपावर कम्पनीले नराम्रा कम्पनीको रोजगारी ल्याए, अनि नेपाली त्यहाँ पुगेपछि अलपत्र पर्न थाले, यो असह्य कुरा हो ।

व्यावसायीहरुले आन्दोलन फिर्ता लिदैनौं भन्दैछन्, के गर्नुहुन्छ ?

केका लागि आन्दोलन गर्दै हुनुहुन्छ तपाईहरु भनेर मैले बारम्बार सोधेको छु । उहाँहरुसँग जवाफ छैन । गरिबलाई लुट्न पाईनँ भनेर आन्दोलन गर्न सुहाउँदैन ।

अर्को कुरा, नयाँ नियम असार २१ बाटमात्र लागू भएको हो । उहाँहरुले ९४ हजार युवाहरुको वैदेशिक रोजगारीका लागि श्रम विभागबाट अनुमति लिइसक्नु भएको छ । १०–१२ हजार त उड्ने अवस्थामा छन् । यो सानो कुरा होइन । हामीले यो छुट पनि दिएका छौं ।

९४ हजार युवालाई लुट्ने छुट दिएको ?

हेर्नुस्, देशको अवस्थाले यस्तो भयो । लाखौं लाख युवा ठगिएका छन् ।  ९४ हजारलाई पनि ठग भनिएको होइन । पहिला भद्रगोलको अवस्था थियो । त्यही अवस्थामा अगाडि बढाईएका कामलाई नयाँ नियमले नबाँधौं, यसअघि जे भयो–भयो भनिएको मात्र हो । यति गर्दा पनि व्यावसायीलाई चित्त बुझेको छैन ।

सरकारको निर्देशन नमान्ने व्यावसायीलाई कारवाही गर्न सक्दैन सरकार ?

किन सक्दैन ? गजबले सक्छ । म हेर्दैछु । काम गरे भनेर अनुमति दिएको हो सरकारले । लुट भनेर दिएको हो र ? म हेर्दैछु । अब धेरै पर्खिन्नँ पनि ।

मैले यो निर्णय खाडीका सबै मुलुक डुलेर, वास्तविकता बुझेरमात्र गरेको छु । जसले रोजगारी दिएको छ, त्यही देशमा आज हाम्रो ईज्जत पानीमा छ । आफ्नै दाजुभाइलाई लुट्नेहरुले अब लाज मान्नु पर्छ ।

वैदेशिक रोजगार व्यावसायी संघको नवनिर्वाचित अध्यक्ष विमल ढकाललाई आफैं लागेर जिताउनु भयो, अहिले उनी नै तपाईका विरुद्धमा आन्दोलन गर्दैछन्, हैन ?

मैले यो व्यावसायमा राजनीति नगरौं भनेकै हो । विमलजी मेरो साथी हुनुहुन्छ । मेरो विरोध गर्नु भयो–भएन म जान्दिनँ । तर राम्रा कामका बारेमा उहाँले पनि साथ दिनु पर्छ । यस विषमा म दलभन्दा माथि छु । मलाई पार्टीले यसो गर, उसो गर भने पनि यसमा मान्ने पक्षमा छैन । यो आम नागरिकको काम हो ।

मन्त्रीकै कारण अब वैदेशिक रोजगारी गुम्दै छ भन्छन् त व्यावसायी ?

आफुले कमिशन पाउँदा रोजगारी नगुम्ने, नपाउँदा गुम्ने ? सोझा नेपाली भएरमात्रै उनीहरु यस्तो कुरा गरिरहेका छन् । वर्षौदेखि निःशुल्क भिषा र निकटलाई नेपाली कामदारले पैसा तिर्न बाध्य भए । उताबाट कामदार पठाऊ, भिषा र टिकटसँगै कमिशन पनि दिन्छौं भन्छन् र त्यसै गर्छन् । यताकाहरु हाम्रा गरिब दाजुभाइलाई लुट, तिमी पनि कमिशन खाउ, हामी पनि खान्छौं भन्छन् ।

नेपाली कामदारको खाडीमा ठूलो माग छ । खाडीमा काम खोज्न जो भारतीय, श्रीलंकन या अन्य देशका कामदारभन्दा नेपाली कामदार बढी इमान्दार मानिन्छन् । यसकारण हामीले नीति राम्रो बनायौं भने रोजगारी खोसिने होइन कि अझ बढ्ने छ ।

तपाईलाई सरकारको सहयोग कस्तो छ ?

विरोध अन्य मन्त्रीज्यूहरुले गर्नु भएको छैन, यही हो सहयोग ।

खाडीमा धेरै नेपाली अलपत्र छन्, नारकीय जीवन विताउन विवश छन् भनिन्छ, कहिले उद्धार हुन्छ ?

यो काम सकिए पछि म खाडीका मुलुकमा जाँदैछु नेपाली कामदारको अवस्था बुझ्न । अब कुनै पनि नेपालीले खाडीमा दुःख भोग्नु नपरोस् भन्ने हो । मैले यसका लागि योजना बनाईसकेको छु । संविधान निर्माणले पनि केही असर त गर्ला तर म छिटै यस विषयमा विशेष काम गर्दैैछु ।इमेज समाचार

छिनिएको हात एक महिना पछि पुनः हातमा जडान

हिजो आज दिनानुदिन नँया नँया चमत्कारिक प्रबिधी पत्ता लाग्ने र त्यसको प्रयोग हुने क्रम बढ्दो छ । बैज्ञानिकहरुले अन्य क्षेत्र जस्तै मेडिकल क्षेत्रमा पनि ठूला ठूला चमत्कारिक प्रयोगहरु सिद्ध गर्न सफल भई सकेका छन् ।

हालसालै मध्य चिनको चागंसा अस्पतालका सर्जनहरुले पनि यस्तै अनौठो उपचार सम्भव तुल्याएका छन् । चाईनाबाट प्रकाशन हुने मेल अनलाईनका अनुसार उनिहरुले एक हात छिनिएको घाईतेको हातलाई खुट्टामा जोडेर एक महिना पश्चात पुनः हातमा जडान गरेका हुन् ।

फेक्ट्रिमा काम गर्ने जो को हात घुम्ने मेशिनमा परेर छिनालीएपछि उनि त्यो छिनालिएको हात लिएर अस्पताल पुगेका थिए । अस्पतालमा डाक्टरहरुले उनको अवस्थाहेरी हातको रक्त कोशिकाहरुलाई जिवित राख्न उनको छिनिएको हात खुट्टामा जडान गरिदिए । एक महिनापछि सोहि हातलाई पुनः छिनिएकै ठाउँमा जडान गरिदिए ।

अहिले जो को हात पहिलेकै अवस्थामा आईरहेको छ । जो भन्छन्, औलाहरु बिस्तारै चल्न खोजिरहेका छन् । जो को अप्रेसन टिमका लिडर डा. ट्यागं जो भन्छन्, जोलाई उनको हात पुनः पहिलाकै अवस्थामा प्रयोग गर्न मिल्ने अवसर जुट्यो । उसो त ट्यागंको टिमले यसअघि २०१३ मा यस्तै खाले घटनामाथि सफलता पाईसकेका छन् ।

तराईमा बंगलादेशीलाई नेपाली नागरिकता र पासपोर्ट बेच्दै

 असार ३ आइतबार - बंगलादेशी नागरिक रियन मियाले असगर अलि शाही र साइदुल इस्लामले जाहिद अलि साहीको नामबाट जिल्ला प्रशासन कार्यालय बाँकेबाट नेपाली नागरिकता र राहदानी बनाएका रहस्य खुलेको छ।

कटकुइया गाविसका सचिब र इलाका प्रशासन कार्यालय नरैनापुरका प्रशासकीय अधिकृतलाई आर्थिक प्रलोभनमा पारेर उनीहरुले २०७० फागुन १२ गते नेपाली नागरिकता बनाएका थिए।

बंगालादेशी नागरिकलाई साउदी सरकारले कामदार भिसामा कडाई गरेपछि साउदी अबरमा रहेका नेपाली नागरिक निजामको सहयोगमा उनीहरू बंगलादेशबाट नेपालगन्ज आएर नागरिकता बितरणमा संलग्न हुने नेपाली कर्मचारीहरुलाई प्रलोभनमा पारी नागरिकता र पासपोर्ट बनाएको अनुसन्धानबाट देखिएको छ।

अभियुक्तहरू बंगलादेशबाट नेपालगन्ज आएर लामो समयसम्म नेपालगन्जको मुसाफिर खाना (मुस्लिम समुदायको धर्मशाला) मा बसेर नागरिकता र पासपोर्ट बनाउनका लागि आवश्यक प्रबन्ध मिलाएका थिए।

नेपाली राहादानी बोकेर काठमाडौं हुँदै साउदी अरब जाने क्रममा २०७१ साउन २० गते उनीहरू काठमाडौंस्थित त्रिभुवन विमानस्थलमा शंकास्पद अवस्था पक्राउ परेका थिए। हिन्दी र अबधी भाषासमेत राम्रोसँग बोल्न नसकेपछि केरकारगर्दा उनीहरु बंगलादेशको नागरिक भएको खुलेको थियो।

 नेपाल प्रहरीले पक्राउ परेका दुबै जनालाई जिल्ला अदालत बाँकेमा नक्कली नागरिकता र पासपोर्ट बनाएको अभियोगमा मुद्दा चलाएको छ। जिल्ला अदालत बाँकेको आदेशपछि दुबै अभियुक्तहरू पुर्पक्षका लागि बाँके कारागारमा छन्।

बंगलादेशी नागरिकलाई नागरिकता दिलाउन बाँके कटकुइयाका ४ का झगरु अलि शाहीले बुबा र जैतुना अलि शाहीले आमा बनेर सहयोग गरेका थिए।

बंगलादेशी नागरिकलाई नेपाली नागरिकता दिलाउनका लागि आबश्यक कागजी प्रमाण जुटाउनका लागि सहयोग गर्ने  झगरु र जैतुना लगायत ११ जनालाई प्रहरीले प्रतिबादी बनाएर मुद्दा चलाएको छ। अभियुक्तहरुले  नेपाली पासपोर्ट बनाउनका लागि  करिब १६ लाख खर्च भएको बताएका छन्।

संविधानको प्रारम्भिक मस्यौदामाथि जनताको राय र सुझाब संकलनको बारेमा तयार पारेको भिडियो हेर्नुहोस

श्रावण २ सनिबार,काठमाडौं - सभासदहरु निर्वाचन क्षेत्र पुगी संविधानको प्रारम्भिक मस्यौदामाथि जनताको सुझाब लिनेछन।  ४ र ५ गतेको राय संकलनलाई भव्य बनाउन नागरिकलाई आ–आफ्नो मोबाइलमा एसएमएस गरी निमन्त्रणासमेत दिने तयारी गरेको छ । योभन्दा अगाडी कर्मचारीहरुबाट भइरहेका सुझाव संकलन प्रक्रिया पनि उत्साहजनक रहेको संविधानसभा सचिवालयले जनाएको छ ।

Video

दुई पक्षबीच झडप हुँदा एकको मृत्यु

साउन २ सनिबार  - रौतहट लक्ष्मीपुर दोस्तीया गाविस– ५मा जग्गाको विषयमा गए राति दुई पक्षबीच झडप हुँदा एक जनाको मृत्यु भएको छ ।

इलाका प्रहरी कार्यालय गरुडाका अनुसार उक्त झडपमा परी सख्त घाइते भएका लक्ष्मीपुर दोस्तीया गाविस– ५ बस्ने ४५ वर्षीया सुखल मन्सुरीको उपचारका क्रममा मृत्यु भएको हो । निजले शौचालय निर्माण गर्ने क्रममा आफ्नो जग्गाको साँध मिचेर बनाएको भन्दै छिमेकी मोख्तार मन्सुरीले विवाद गरेपछि राति ९ बजे दुवै पक्षबीच झडप भएको र सो क्रममा दुवै पक्षबीच कुटाकुट भएको थियो ।

सो क्रममा ढुङ्गाले हान्दा टाउकामा लागि गम्भीर घाइते भएका सुखल मन्सुरीको उपचारका क्रममा चन्द्रनिगाहपुर अस्पतालमा मृत्यु भएको हो । घटनामा संलग्न भएको आरोपमा प्रहरीले तीन जनालाई पक्राउ गरेको छ ।

पक्राउ परेकाहरु पनि घाइते भएकाले उनीहरुको गरुडास्थित अनामिका हेल्थ क्लिनिकमा प्रहरीको निगरानीमा उपचार भइरहेको छ । शव परीक्षणका लागि चन्द्रनिगाहपुर अस्पतालमा राखिएको प्रहरीले जनाएको छ ।

बजरंगी भाईजान भारत र पाकिस्तान छुट्टिएपछिको कथामा आधारित फिल्म भिडियो सहित हेर्नुहोस

‘बजरंगी भाईजान’ सीमापार प्रेमको क्रसओभर फिल्म हो ।फिल्ममा धेरै ‘मेलोड्रामा’ छ, धेरै कुराहरु पत्याउन गाह्रो हुन्छ, अधिकांश गीतहरु गम्भीर कथामा नसुहाउने खालका छन् । यि सबै हुँदाहुँदै पनि फिल्मलाई चलाखीपूर्ण तरिकाले सजाइएको छ । केही मानवीय स्पर्श छ, एउटा दृष्टिकोण छ, एउटा आवाज छ ।
यो रोमान्टिक फिल्म फिल्म पनि होइन र एक्शन फिल्म पनि होइन ।वास्तवमा यो फिल्म सलमानमाथि केन्द्रित पनि छैन । यो उनको ‘मिशन’ मा केन्द्रित छ । फिल्ममा नवाजुद्दीन सिद्दीकी र सानी बालिका हर्षालीले तपाइँलाई स्तब्ध बनाउने छन् ।  

फिल्मको कथा सरल छ । पवन चतुर्वेदीले एउटी बालिका भेट्टाउँछ जो पाकिस्तानी हो र बोल्न सक्दैन ।
यो बालिकालाई सीमापार रहेका आमा–बाबुकहाँ पुर्‍याउनु पवनको ‘मिशन’ बन्छ । नवाज एउटा भिडियो भाइरल भएको पाकिस्तानी रिपोर्टरको भूमिकामा छन्– जसले सलमानलाई सहयोग गर्छ ।

फिल्म ‘गदर’ भन्दा ठिक उल्टो कहानी छ यसमा । भारत र पाकिस्तानबीचको कथा जहाँ सीमामा काँडेतार लगाइएको छ, सेना छ र सर्वसाधारण पनि । पूर्वाग्रह छ तर कोही खलनायक छैन ।फिल्मले धेरै जसो मानिसभित्र रहेको असलपनाको कुरा गर्छ ।

हिरोलाई भारत र पाकिस्तानमा बराबर मनपराइन्छ । यो मानवतावादी र भावुक फिल्मलाई पनि त्यसै गरी मनपराइने छ । - बीबीसी

video

Bajrangi Bhaijaan Full Movie

दक्षिण एसियाको सबैभन्दा महङ्गो सहर काठमाडौ

 काठमाडौ दक्षिण एसियाको सबैभन्दा महङ्गो सहर भएको इकोनोमिस्ट म्यागेजिनले सार्वजनिक गरेको ‘वर्ल्ड कस्ट अफ लिभिङ इन्डेक्स’मा देखाइएको छ।

उक्त सूचकांकमा मुम्बई विश्वकै सबैभन्दा सस्तो सहर भनिएको छ। दैनिक जीवनयापनका लागि आवश्यक पर्ने विभिन्न वस्तुहरु खाद्यान्न, मदिरा, पोशाक, भाडा, यातायात र बिजुली पानी आदिको मूल्यमा गरिएको मापनको आधारमा यो सूची सार्वजनिक गरिएको हो।

यो सूचकांकमा मुम्बइले ३९ अंक पाएको छ । विश्वकै दोस्रो सस्तो सहर कराँचीको ४० अंक छ। तेस्रो सस्तो सहरमा नयाँ दिल्ली छ। सूचकांकमा दिल्लीले ४३ अंक पाएको छ । चौथो सस्तो सहरमा सिरियाको दमास्कसले ४४ अंक पाएको छ। यस्तै काठमाडौंको पनि समान ४४ अंक भएपनि सूचीमा पाँचौ स्थानमा राखिएको छ ।

काठमाडौंपछि अल्जेरियाको अल्जियर्स, रोमानियाको बुखारेस्ट, पनामाको पनामा सिटी, साउदी अरबको जेद्दाहा र रियाद छन् ।

आफ्नी श्रीमतिलाई कुटीकुटी हत्या गरी खोलामा फल्यो

सनिबार २ असार -भक्तपुरमा एक पुरुषले भाउजूको समेत साथ लिएर आफ्नी श्रीमतिलाई कुटीकुटी हत्या गरी हनुमन्ते खोलामा फालेको खुलासा भएको छ।

महानगरीय प्रहरी वृत्त ठिमीले श्रीमती मारेर हनुमन्ते खोलामा फाल्ने पति र हत्यामा सघाउने उनकी भाउजूलाई पक्राउ गरेको छ।प्रहरीले सिराहा भदैया ६ माइतीघर भएका वर्ष ३० की साहजादी खातुनलाई मारेर भक्तपुरको हनुमन्ते खोलामा फाल्ने सिराहा मनहर गोलबजार ६ बस्ने वर्ष १९ की जाविर अन्सारी र हत्यामा सहभागी अन्सारीकी भाउजू मनिका चौधरी अन्सारीलाई शुक्रबार राती काठमाडौंको कालोपुलबाट पक्राउ गरेको हो।

वृत्तका प्रहरी नायब प्रहरी उपरीक्षक भीमकिरण बोगटीका अनुसार शुक्रबार साँझ भक्तपुरको अनन्तलिङ्गेश्वर नगरपालिका ५ स्थित हनुमन्ते खोलामा खातुनको शव फेला परेको थियो।शरीरको पछाडिपट्टि घाउ र चोटपटक लागेको खातुनको सव भेटिएपछि खोजतलास गर्दै जाँदा उनकै श्रीमान् जाविर फरार रहेको पाइएको र त्यसपछि प्रहरीले खोजतलास गरी पक्राउ गरेको  नायब प्रहरी उपरीक्षक बोगटीले जानकारी दिए।


उनीहरु भक्तपुरको अनन्तलिङ्गेश्वर नगरपालिका ५ बालकोटमा कोठा लिएर बस्दै आएका थिए । खातुन भने मध्यपुर थिमीस्थित राजन ढुंगानाको ब्याग पसलमा काम गर्थिन् ।श्रीमान र श्रीमतीको उमेर धेरै फरक भएकाले उनीहरुबीच बेला बेलामा झैझगडा हुने गरेको प्रहरीको प्रारम्भिक अनुसन्धानमा खुलेको छ । साथै खातुनको यसअघि नै अन्य केटासँग विवाह भइसकेको हुँदा दुईजनाबीचको सम्बन्ध राम्रो थिएन । दुई वर्षअघि विवाह गरेका खातुन र अन्सारीबीच हुने झगडा प्रहरीसम्म पनि पुगेको थियो ।

घटना भएको दिन बिहीबार पनि श्रीमानश्रीमतीबीच झगडा भएको थियो । झगडाले उग्र रुप लिएपछि दुईजना बालकोटस्थित महानगरीय प्रहरी प्रभाग पुगेका थिए । प्रभागमा दुवैजनाले अब पुनः झगडा नगर्ने वाचा गरेपछि राती साढे नौ बजे श्रीमानश्रीमती कोठातर्फ लागेका थिए ।तर बाटोमा पुनः झगडा भएपछि अन्सारीले श्रीमतीलाई कुटीकुटी मारेर हनुमन्ते खोलामा फालेको प्रहरी अनुसन्धानबाट देखिएको छ।

‘प्रहरीकहाँ मिलेका दुई जना कोठातर्फ फर्कने बेला फेरि झगडा हुँदा अन्सारीले कुटपिट गर्दा मरेकी श्रीमतीलाई हनुमन्ते खोलामा फालेको स्वीकार गरेका छन्’, नायब प्रहरी उपरीक्षक वोगटीले भने, ‘श्रीमतीलाई मारेपछि फाल्नलाई अन्सारीले आफ्नी भाउजूलाई बोलाएका थिए र भाउजूले पनि देवरानीको लास खोलामा फाल्न सघाएर दुवै भागेका थिए ।’

वृत्तले प्रहरीको अपराध महाशाखाको सहयोगमा शुक्रबार राती हत्यामा संलग्न अन्सारी र उनकी भाउजू मनिकालाई काठमाडौं कालोपुलबाट नियन्त्रणमा लिएको हो ।
प्रहरीले हत्यामा संलग्न अन्सारी र मतियार बनेकी मनिका दुवैलाई कर्तव्य ज्यान मुद्दा चलाउँदै थप अनुसन्धान अघि बढाएको छ ।
फाइल फोटो

एक महिलालाई अस्पताल लैजाँदै गर्दा कारको सिटमै बच्चा जन्माएकी भाइरल भिडियो हेर्नुहोस्

 संयुक्त राज्य अमिरिकाको  ह्युसटन सहरमा एक महिलाले कारको सिटमै बच्चा जन्माएकी छिन् । डेलिभरीका लागि अस्पताल लैजाँदै गर्दा बाटैमा सुत्केरी व्यथा लागेपछि कार चालकले खिचेको थियो।
 अन्य जानकारी खुलाएको छैन। -एजेन्सी

सोलोमन द्वीपमा ७ म्याग्निच्यूडको भूकम्प

असार २ सनिबार - आज बिहान सोलोमन द्वीपको लाताबाट ७८ किलोमीटर पश्चिम-उत्तरलाई  केन्द्रबिन्दु बनाएर  ७ म्याग्निच्यूडको भूकम्प गएको छ। यू.एस.जी.सी.क अनुसार सोलोमन द्वीपको तटीय क्षेत्रमा ७ म्याग्निच्यूडको भूकम्पगएको बुझिएको छ। सबै तथ्यांकको अध्ययनपछि वैज्ञानिकहरुले सुनामीको खतरा समाप्त भएको जनाएका छन् । सुरुमा ७.५ म्याग्निच्यूडको भनिए पनि पछि सुधारिएको हो।

अस्ति सोमबार ५ दिनअघि मात्रै पनि ४.८ म्याग्निच्यूडको भूकम्प गएको थियो। सन् २०१३ मा ८ म्याग्निच्यूडको भूकम्पपछि सुनामी आउँदा सो क्षेत्रमा १० जना मानिसको ज्यान गएको थियो । सुनामीले बस्ती भत्काउँदा हजारौं मानिस विस्थापित भएका थिए।

एक १६ वर्षकी केटीलाई भिडले कुटि कुटी बेहोस बनाएर जिउँदै जलाएको भिडियो

ग्वाटेमालाको रिओ ब्राभो नगरमा डरलाग्दो घटना भएको छ । एक १६ वर्षकी केटीलाई भिडले कुटि कुटी बेहोस बनाएर जिउँदै जलाएको भिडियो सार्वजनिक भएको छ ।

ती किशोरीमाथि एक ट्याक्सी ड्राइभरलाई गोली हनेको आरोप लागेको थियो । उनी र अन्य २ युवक मिलेर ६८ वर्षीय कार्लोस इनरिक नामका ट्याक्सी ड्राइभरमाथि गोली प्रहार गरेको भन्दै भिडले उनलाई लछार पछार र कुटपिट गरेपछि जिउँदै जलाएको समाचारमा जनाइएको छ ।

उनीसँग रहेका २ युवक भागेको तर ती किशोरीलाई भने भिडले समातेर कुटेको थियो । एक वृद्धले खिचेको भिडियोमा उनलाई कुटेर मारिँदै गर्दा मानिसहरु रमिते बनेको देखिन्छ ।

पुलिसले हस्तक्षेप गर्दा समेत मानिसहरुले पुलिसलाई रोकेर युवतीलाई कुटेका थिए । यो आक्रमणको विषयमा छानविन भैरहेको प्रहरीले जनाएको छ ।

VIDEO